Studentoj de la interlingvistikaj studoj tradicie vizitas Pollandon fine de unu el siaj vintraj semajnoj en Poznano. Ĉi-foje ili elektis Vroclavon kaj la sabaton (9-an de februaro 2019) alvenis 6 personoj. La grupo estis sufiĉe internacia, kun Unika kaj Ella el Koreujo, Ĝoja el Ĉinujo, Emerson el Brazilo, Raul el Usono/Dominiko, kaj Viko el Hispanujo. Anna Skudlarska kaj Ruselo ĉiĉeronis tra la urbocentro. Interalie, la grupo entuziasme grimpis la 300 ŝtupojn de la preĝeja turo apud la ĉefplaco, kie la vido tre belis pro la bona klara vetero. Poste ili ĝuis la esperantan sonprogramon en Panoramo de Racławice kaj vizitis plej malnovan parton de la urbo – Ostrów Tumski. Fine de la promeno Teresa gvidis en la universitato kaj al la vroclava esperanta klubo por teumado kaj babilado antaŭ ilia vespera reveno al Poznano.
Aŭtoro: Damjes
Feriado 2018a jaro – resumo
Gekaraj!
Dankon por Via partoprenado. Estis agrabla tempo kaj ni esperas, ke ankaŭ por Vi. Fotoj de nia feriado estas atingeblaj ĉe
https://photos.app.goo.gl/JHJ91vaLkeRHpqde7
Ĝenerala Kunveno de Silezia Esperanto-Asocio
Estimataj anoj de Silezia Esperanto-Asocio,
Laŭ rezolucio de Estraro de Silezia Esperanto-Asocio ni kunvokas Ĝeneralan Kunvenon de Silezia Esperanto-Asocio en 18.08.2018 (sabato) je 10.00. Ĝenerala Kunveno okazos en nia sidejo, ul. Kościuszki 35a (eniro tra numero 37 apud Poŝtoficejo – Poczta Polska), Vroclavo.
Lige kun formalaj problemoj pri registrado de nia nova Statuto en Landa Juĝregistro (KRS) kaj validigo de Reguligo pri Protektado de Personaj Datumoj (GPRD/RODO) ni devas kunvoki Ĝeneralan Kunvenon. Dank’ al tio ni ordigos organizajn aferojn kaj montros novajn eblecojn de kunlaboro en nia Asocio.
Programo de la Kunveno:
- Informoj pri novaj eblecoj de kunlaboro
- Aktualigado de datumoj (retpoŝto)
- Rezolucio pri ŝanĝoj de SEA Statuto
- Liberaj postuloj
Nome de la Estraro
Michał GABOR
vicprezidanto
de Silezia Esperanto-Asocio
Feriado en Lądek Zdrój
Ni proponas al Vi restadon en Lądek Zdroj en la tagoj 1-9 de septembro 2018. La programo kutima: matenaj lingvaj kursoj, ekskursoj kaj montaraj promenoj, rondaj dancoj, komuna kantado, interesaj prelegoj. La ripozdomo, kie ni loĝos, posedas lokon por bivakfajro kaj ankaŭ por gimnastiko aŭ matena dancado. Najbare troviĝas arbaro, en kiu oni povas promeni ĉiumatene. De la ripozdomo estas proksime al ĉiuj necesaĵoj: aŭtobusa haltejo, centro de kuracloko kun kafejoj, parko kaj akvofontoj. En la centro troviĝas ankaŭ historia, belaspekta termika naĝejo “Wojciech” – vere rekomendinda por uzi ĝin. Lądek troviĝas tre proksime al ĉeha landlimo, do certe nian tuttagan ekskurson ni planos tiel, ke ni vizitu landon de najbaroj.